آيزك اتقدّم لها بالفعل واتجوّزوا، ميريت ما عاشتش معاه قبل الجواز لأن خلفيتها متشددة نوعاً، وده بالنسبة لي كان سبب تاني عشان أحترِمها، مخلّفة بنت زي السكر وبتتعامل بخجل عذراء في القرن الـ 17!
ميريت كانت بتقضّي معايا معظم وقتها، كونها مدرّسة ده بيدّيها مساحة أجازة طويلة فعلاً، ميريت وسامي ملوا عليّا حياتي اللي كانت أصبحت فارغة بعد مـ,,ـوت جوزي.
وميريت أصبحِت حامل.
كنت متخوّفة أطلب منها أرتّب أي حفل للجَنين، بس لقيت والدتها بتتواصل معايا وبتقوللي إنهم بيرتّبوا لحفلة في البيت عند آيزك وعايزاني عشان تاخد رأيي!
رأيي كان مهم بالنسبة لهم! وأنا بكتب دلوقتي جه في بالي سؤال أي حد بيقرأ هيسأله .. طلبوا مني أروح عشان أدفع مصاريف الحفلة؟
الإجابة لأ! أهلها شاركوا مع آيزك بمبلغ مش قليل بالمرّة، لو كانوا عايزينّي عشان يستغلّوني مادياً حقيقي ما كنتش همانع ده!
أنا في سن يخليني متصالحة مع فكرة إني أشتري السعادة بالفلوس وأنا راضية، بس همه ادّوني السعادة بدون مقابل.
وجه حفيدي من آيزك، ميريت قالت إنها حابّة تسمّيه چون على اسم جوزي السابق! ده كان اختيارها هي، تكرّم سيرة جوزي الراحل على الرغم من إنها ما شافتهوش أصلا!
ومن وقتها وأنا مجنونة بأحفادي “سامي” و”چون”، ومش هنكر إني بغدق عليهم بالهدايا، من أسبوعين كان عيد ميلاد سامي اللي سألْتها قبلها تحبي أجيب لِك حصان؟
قالت لي أي حاجة منِّك هتبقى حلوة يا تيتة!
يا روح تيتة يا قلب تيتة!
ما جبتِش الحصان لأني بعد ما اتكلمْت مع ميريت لقت إن مصاريف الانفاق عليه شهرياً هتكون كتيرة وهي مش حابّة ده، على الرغم إني صمّمْت إني أدفع مصاريف رعايته في الاسطبل الخاص بيه معنديش مشكلة، إلا إنها برضه رفضِت.
فـ قرّرْت أهدي سامي سلسلة فيها دلّاية ألماظ، دي كانت قطعة متوارثة في أسرتي، سامي فرحِت بيها بشِدّة، ولبسِتْها في الحفلة، وعرِفْت إنها رافضة تقـ,,ـلعها حتى لما ميريت صمّمِت تخـ,,ـلعها قبل ما تروح المدرسة، سامي كلمتني مفحومة من العياط إنها مش عايزة تخـ,,ـلع هديتي!
كلّمْت ميريت واستسمحتها تسيبها لابساها، قالت لي إنه مش مناسب تروح المدرسة بيها بس هي مش هتحب تضايقني، واتفقنا احنا التلاتة أسبوع وتخـ,,ـلعها وتسيبها مع ماما في البيت.
ومن هنا بقي بدأِت الدراما!
فاكرين سوزن مرات آدم ابني؟ دي تقريباً ما صدّقت حد دخل حياتي واختفت بعيالها تماماً، آدم كان بيتواصل معايا ويزورني ويتطمّن عليا لوحده، وللأمانة الشديدة الموضوع ده ما سبّب ليش أي مشاكل لأني فعلياً ما بقيتش مهتمة لوجودها!
الست سوزن بقى فجأة كده لقيتها بتكلمني وباين على صوتها إنها منفعلة وبتسألني إذا إدّيت لـ بنت ميريت سلسلة ألماظ.
قلت لها آه وأنا مستغربة!
هنا بقى انفجرِت وقالت لي إني بفضّل عيال ميريت على عيالها، وما بكلّفش خاطري أشتري لأولادها حاجة وبكتفي في عيد ميلادهم أبعت لهم كروت مشتريات، وإني موجّهة كل فلوسي لـ ميريت وعيالها.
وإني كده كأني بقول لعيالها إني بفضّل أولاد آيزك وميريت عليهم!
قلت لها وليه كأني؟ أنا فعلياً بفضّلهم عليهم وهي السبب في ده!
اتفتحْت فيها إني حتى إني أهادي أحفادي كنت محرومة منه، مفيش هدية جبتَها عجبِتْها، وإنها هي اللي اقترحِت أهاديهم فلوس أفضَل عشان “ذوقي” مش مناسب للأطفال اللي لسه ما كوّنوش ذوق أساساً!
قلت لها إني من حقي أهادي مجوهراتي للّي يستحقوها ومش هي اللي هتيجي تقول لي أعمل إيه في مالي!
قالت لي لأ يا حماتي مش مالِك ده مال جوزي! وإذا كنتي ناوية تبعزقيه قبل ما تمـ,,ـوتي على العـ,,ـار والدون يبقى لازم يتحطّ لِك حدود!
صـ,,ـرخْت فيها لأنها كانت بتشتم في ميريت بكلامها ده، إلّا إنها كمّلت إن سامي مش حفيدتي أصلاً ومش بنت آيزك، وإنها هتقول لآدم يرفع عليّا قضية إني مختلّة ويمنعني من التصرف في فلوسي!
قلت لها إن سامي حفيدتي أكتر من عيالِك يا صفراء يا أم غلّ! قلت لها إنها جعانة ولو حاولِت تقلِب ابني عليّا ونجحِت فـ أنا ليا وش تاني محدّش يعرف بيه!
قفلت السكّة في وشها وكلمْت آدم اللي قاللي إنه مشغول في المستشفى، قعدت أصـ,,ـرخ فيه ييجي حالاً!
في خلال ربع ساعة كان جاي لي على ملى وشّه، حكيت له اللي حصل من مراته كان مصدوم، في الوقت ده كانت بتحاول تكلمه رد عليها بعصبية وقعد يصـ,,ـرخ فيها إنه مش هيسمع منها أي كلام قبل ما تعتذر لي وإنه عندي في البيت لغاية ما تعمل كده!
رد فعله كان كأنه ميّة باردة اتدلقِت على نار غضبي طفته، مجرد إحساسي إن العقربة دي ممكن تقلِبه عليّا كان مرعب بجد!
على مدار الأيام اللي تلت الخناقة دي كنت بشوفه بيتابع مع المحامي بتاعه، لما سألْته عن السبب قاللي إنه بيضمن إن عقد حماية الممتلكات ساري ومفيهوش ثغرات! قلبي وجعني وقلت له إني مش هحب إنه ينفصل بسببي قاللي إنه بيشوف كل الاحتمالات عشان ما يحسّش إنه هيتغفِّل!
في نهاية الأسبوع جت سوزن وهي مبربرة وعينيها وارمة، كان العيال معيطين برضه وقاعدين بعيد عني وعن أبوهم! قعدِت بقي تعيط بزيادة وتقوللي إني عمري ما فهمْتَها وعمري ما سعيت أقرّب منها، وإن ميريت ساحرة، وأهلها من قرون معروفين بالسحر وعايزة تجيب حد يقرأ عليّا!
قلت لها السحر كان في تصرفاتها وهي بأسلوبها خلّتني قريبة منها ومن أولادها، قالت لي خلاص نبدأ من أول وجديد وصفحة بيضاء!
قلت لها تقدر تعمل اللي هي عايزاه بس أنا مش هعدِل بينها وبين ميريت في التعامل، لأن اللي بيني وبين ميريت اتبنى في سنين والفجوة اللي بيني وبينها – سوزن – وسعِت في سنين أكبر.
آدم كان معاها وهي ماشية مبربرة وسامعاها عمّالة تقول له شايف أمك عايزة تفرّق ما بينك وبين أخوك في المعاملة وتخلّيه هو وميريت ملوك البيت ويورثوا كل حاجة لوحدهم ازاي.
مش عارفة آدم هيصمد قدام سمّها أد إيه، اللي مخوّفني أكتر إني قلقانة تؤ,ذي ميريت أو سامي أو چون!
بس أعتقد إنها أجبن من كده … مش هتقدر تضايقهم دلوقتي، يمكن بعد ما أمـ,,ـوت!
أنا هعمل وصيّة أأمِّنهم فيها! لازم أعمل كده!
#ريديت
