فيلا الخواجة محمد عصمت
قلبي كان هيقف من الخوف جسمي كله بيترعىش من البرد بصيت ناحية السلم كان فيه خيال بيتحرك وسط الضلمة وقبل ما اتحرك من مكاني سمعته بيقول بغضب هتيجي ولا هقول للمدرسة كلها انك خواف وجبان.. وانت عارف لو عرفوا انك جبان هيعملوا فيك ايه
كنت عارف.. مرة عرفوا ان محمد سليم بتاع ٣٥ بيخاف من الصراصير راحوا اشتروا صراصير بلاستيك وفضلوا يجروا وراه لحد ما وقع من فوق السلم ورجله اتكىسرت قربت من السلم وشفت الضل بيتحرك طالع لفوق وصوت الهمس بيزيد وهو بيقول تعالى!
عديت من بين الحيطة والدكك وطلعت على السلم المترب ناحية الدور اللي فوق كان شبه بقية الادوار ممر طويل مليان اوض يمين وشمال اللي بقت دلوقتي فصول سالته بصوت بيترعىش انت فين
سمعت صوت همس بيقول من ورايا انا هنا!
بصيت ورايا وقلبي
هيقف من الخوف بس مكانش فيه حد المرة دي رعىشة صوتي زادت وانا بساله كريم.. انت فين
سمعت الصوت من فوقي كانه ماشي على السقف قالي انا هنا!
بصيت فوق وبرضه مكانش فيه حاجة المرة دي ناديت عليه وانا قلبي بيدق بقوة كريم.. انت فين
المرة دي مردش عليا بس من جوا واحدة من الاوض اتشاطت كان بيبسي مطبقة زي الكورة وشفت ضله على الارض وهو بيقول تعالى! تعالى يا عمرو!
قربت من الاوضة اللي خرجت منها الكان وانا بترعىش جسمي كله بيتنفض ببص ورايا كاني خايف حد يهاجمني من ورا وصلت باب الاوضة الباب كان موارب زقيته بايدي ولمحته واقف جوا ادام الشباك وضهره ليا دخلت الاوضة وقبل ما انطق بكلمة.. الباب اتقفل ورايا بمنتهى القوة لف وشه وبص في عينيا هو كريم! بس فيه حاجة غلط! عينيه مش بتلمع زي ما تكون مطفية! ابتسامته مرعبة وحاسس انها اكبر من الابتسامة الطبيعية! مد ايده ناحيتي وهو بيقول قربنا نخلص.. هات ايدك!
مديت ايدي زي المسحور حاسس وكاني ماليش سيطرة على جسمي بس دا مش كريم.. فيه حاجة غلط.. دا مش كريم.. قبل ما يلمس ايدي فقت رجعت لورا قلتله بخوف انت مش كريم!
في اللحظة دي اختفى من ادامي شبابيك الاوضة كلها اتقفلت بعتف لدرجة ان ازازها اتكىسر سمعت صوت خطوات غريب وكان فيه ناس كتير في الاوضة بتجري من حواليا رغم اني مش شايف حد فيهم
الخطوات بتجري يمين.. شمال.. ادامي.. ورايا.. وقبل ما افهم اي حاجة من اللي بتحصل حسيت بايده على كتفي.. قوية وناشفة بصيت على ايده اللي ماسكة كتفي وشفتها كانت سودا.. طويلة.. ضوافره قذرة ومكسورة وسمعت صوته بيقول حاجة من اتنين.. يا انا عجزت ومبقيتش قوي زي الاول.. يا انت ذكي جدا.. وفي الحالتين.. انت بتاعي يا عمرو!
نفسي اتقطع مكنتش قادر اخد نفسي حسيت ان هيغمى عليا بس في اللحظة دي سمعتها!
عمرو! انت فين يا عمرو!
ماما جت! بصيت ورايا ومكانش له اي اثر جريت زي المجنون وبحكي لها عن الشبطان اللي قابلته هدتني وقالتلي ان مفيش حاجة اسمها كدا.. دا بس اكيد عشان كنت قاعد لوحدي دخلت الفصل اجيب شنطتي وخرجت بسرعة مسكت ايدها طول الطريق لحد ما وصلنا البيت!
طلعت اوضتي من غير ما اكل جسمي كله بيترعىش شاحب ولوني مخطوف ريقي ناشف ماما قالتلي انها هتعملي حاجة سخنة اشربها وانام شوية عشان ابقى كويس وبعد ما اصحى ابقى اكل..
دقيقتين وسمعت خبط على الباب بعدها بشوية سمعت الباب بيتفتح وماما بتدخل كانت مبتسمة وهي بتقرب مني قعدت على طرف سىريري وهي بتمد ايدها ناحيتي ابتسامتها وسعت حسيت بشعر جسمي كله بيقشعر بدون سبب مفهوم فيه رعىشة مشت في جسمي كله والعرق البارد ملى جسمي ساعتها عرفت انها مش ماما مدت ايدها ناحيتي وهي بتقول هات
ايدك يا عمرو! هات ايدك يا حبيبي!
رجعت لورا بخوف وانا بقول انت مش ماما لا.. لا.. لااااااا
غمضت عينيا وسمعته وهو بيقول بصوت مخيف قلتلك انت بتاعي بس انت ذكي وانا محتاج ذكايك دا.. مسيرك تبقى بتاعي.. لو مش النهاردة.. يبقي بكرة!
ماما دخلت الاوضة على صوت صريخي وهو دا الفرق بينها وبينه ماما عمرها ما خبطت على باب الاوضة قبل ما تدخل
دي مكانتش اخر مرة اقابله قابلته بعدها كتير في الاول كنت بصرخ وبفرج عليا الناس لحد ما في المدرسة بعدوا عني وقالوا عليا عمرو المجنون بابا وماما ودوني لدكتور نفسي وقالي ان بعاني من تهيوات ووصف لي ليستة دوا كبيرة الكل بدا يخاف مني ويبعد عني.. وبسببه لقيت نفسي لوحدي!
بعدها اخدت بالي من حاجة مهمة.. في كل المرات اللي اتقابلنا فيها كنت لوحدي وكان بيختفي قبل ما حد يظهر وكل مرة كان بيطلب مني امد له ايدي لما بقيت في ثانوي كنت تعبت من نظرات ومعاملة الناس ليا على اني مجنون تعبت من الدوا اللي باخده عمال على بطال وانا اصلا مش مجنون!
فقررت ان طالما كدا كدا هلعب اللعبة غصب عني.. يبقي هلعبها بقواعدي انا!
بقيت بتجاهله تماما لا ببص ناحيته ولا برد عليه في الاول الموضوع كان صعب مرهق ومرعب.. لكن واحدة واحدة قدرت اتجاهله ساعتها بدا يظهر لي وسط الناس ويكلمني ويضايقني.. طبعا
